სიახლეები

„ააიპ „საქართველოს ცხოველთა დაცვისა და გადარჩენის საზოგადოება“ – GSPSA -მ „ზოოლოგიური ცენტრის“ გადასცა  გრანტი ფინანსური დახმარების სახით.

  

2021 წლის 23 თებერვალს ააიპ „ზოოლოგიური ცენტრი“-ს დამფუძნებელმა სოსო ჯიქურიშვილმა და ააიპ „საქართველოს ცხოველთა დაცვისა და გადარჩენის საზოგადოება“ – GSPSA-ს  თავმჯდომარემ თეიმურაზ წიქორიძემ ხელი მოაწერეს ხელშეკრულებას გრანტის მიღების, გაცემის და გამოყენების თაობაზე. ხელშეკრულების თანახმად GSPSA-, როგორც დონორმა ორგანიზაციამმიზნობრივი ფინანსური დახმარება 5000 ლარის ოდენობით  გადმოურიცხა ჩვენს ორგანიზაციას  დაობლებული პატარა ბელებისთვის 150 კვ.მ. ფართზე ვოლიერის მოსაწყობად. „ზოოლოგიურმა ცენტრმა“ დათვების გადარჩენის და დახმარების მიზნით თავისი არსებობის მანძილზე პირველად მიიღო მიზნობრივი დაფინანსება გრანტის სახით.

2021 წლის 3 თებერვალს მცხეთის მუნიციპალიტეტის ტერიტორიაზე, საბადურის ტყეში ადგილობრივი მოსახლეობის მიერ ნაპოვნი იქნა ორი დათვის ბელი, რომელთა ასაკი არ აღემატება 3 თვეს.   საბადურის ტყეში დათვები არ ბინადრობენ.  დედა დათვის გარეშე ამ ბელების აღმოჩენა ადასტურებს, რომ  ბრაკონიერის მიერ სხვა ტერიტორიაზე მოკლულ იქნა დედა დათვი, ხოლო ბელები გაიტაცეს. სავარაუდოდ დედა დათვის მკვლელმა ვერ გაყიდა დაობლებული ბელები და მტკიცებულების დაფარვის მიზნით ისინი გაუშვა საბადურის ტყეში „დათვების თავშესაფრის“  სიახლოეს.  „ზოოლოგიური ცენტრის“ დამფუძნებლის მიერ მოხდა დაობლებული ბელების გადაყვანა თავშესაფარში, მაგრამ მათ დასაბინავებლად საჭირო გახდა ბელებისთვის შესაბამისი ტერიტორიის, ვოლიერის და ბუნაგის მოწყობა. ასევე 3 მარტს ონის რაიონიდან თავშესაფარში მიღებული იქნა ადგილობრივი მოქალაქის მიერ ტყეში უდედოდ დაყრილი ორი დათვის ბელი ასაკით ერთ თვემდე. ეს ბელებიც თავშესაფარში არიან მიღებულნი.

ვინაიდან ჩვენი ორგანიზაციის თავშესაფარს აქვს მხოლოდ მცირე და არასტაბილური დაფინანსება შემოწირულობების სახით, GSPSA-მ გამოგვიწოდა დახმარების ხელი და მიიღო გადაწყვეტილება ფინანსური დახმარება გაეწია ამ ბელების დაბინავების და გადარჩენის მიზნით.  სამწუხაროა, რომ ამ ცხოველებსაც მთელი ცხოვრება  თავშესაფარში, ტყვეობაში მოუწევთ ცხოვრება.

აღსანიშნავია, რომ  2018 წლის 5 აგვისტოს, მცხეთის რაიონში, ცხვარიჭამიაში, საბადურის ტყეში არსებულ დათვების თავშესაფარში  საქართველოს ცხოველთა დაცვისა და გადარჩენის საზოგადოების  თავმჯდომარის და „ზოოლოგიური ცენტრის“(დათვების თავშესაფარი) დამფუძნებლის მიერ ხელმოწერილ იქნა მემორანდუმი ურთიერთანამშრომლობის შესახებ ცხოველთა გადარჩენის და მათი უფლებების დაცვის უზრუნველყოფის მიზნით.

საქართველოში უმძიმესი მდგომარეობაა გარეული ცხოველების, მათ შორის საქართველოს წითელ ნუსხაში შეყვანილი მურა დათვის, ბრაკონიერების მიერ განადგურების მხრივ.  ყოველწლიურად საქართველოში ნადირობის ლიცენზიას მიმართავს 100 000-ზე მეტი მონადირე, ხოლო ბრაკონიერების რიცხვი გაცილებით მეტია. სამწუხაროა ის ფაქტი, რომ მუდმივად მიმდინარეობს მურა დათვების მოკვლა-განადგურება. მიუხედავად იმისა, რომ კანონი მკაცრია წითელ ნუსხაში შეყვანილი ცხოველების მკვლელობის მიმართ, სამწუხაროდ სამართალდამცავი ინსტიტუტების მხრიდან საქმის მოკვლევა, ამ კანონის აღსრულება და დამნაშავის დასჯა არ ხორციელდება და დიდ  პრობლემას წარმოადგენს.

განსაკუთრებით  აღმაშფოთებელია, როდესაც ბრაკონიერები დედა დათვს კლავენ და ბელები მიჰყავთ გასაყიდად, ან  გასაჩუქებლად, ან უკანონო ტყვეობისთვის.   წლების განმავლობაში ათეულობით მსგავსი ფაქტია დაფიქსირებული.

საბადურის ტყეში არსებულ დათვების თავშესაფრის ტერიტორიაზე  მარტის თვის ბოლომდე GSPSA-ს მიზნობრივი დაფინანსებით „ზოოლოგიური ცენტრი“  დაობლებული ბელებისთვის და ასევე სხვა ახალგაზრდა დათვებისთვის მოაწყობს დაცულ ტერიტორიას.

„ზოოლოგიური ცენტრი“ მადლობას უცხადებს  პარტნიორ ორგანიზაციას -„საქართველოს ცხოველთა დაცვისა და გადარჩენის საზოგადოებას“.


გარემოს დაცვისა და სოფლის მეურნეობის სამინისტროს ინიცირებული კამპანია „Food Waste“ ოფიციალურად გაიხსნა.

 

2019 წლის 10 ოქტომბერს გარემოს დაცვისა და სოფლის მეურნეობის სამინისტროს წარმომადგენლებმა, ცხვარიჭამიაში არსებულ დათვების თავშესაფარში, სამინისტროს მიერ ინიცირებული კამპანია „Food Waste“ ოფიციალურად გახსნეს

კამპანიის მიზანია საქართველოს „წითელ ნუსხაში“ შეტანილი და მოსახლობის ტყვეობიდან გამოხსნილი მურა დათვების საკვები პროდუქტით უზრუნველყოფა.

კამპანიაში „Food Waste“ რამდენიმე მსხვილი სუპერმარკეტი უკვე ჩაერთო, რომელთა შორისაა „კარფური“, „აგროჰაბი“ და „სპარი“. არაერთმა კომპანიამ და ფიზიკურმა პირმა გამოთქვა დათვების დახმარებისა და დისტანციური მეურვეობის სურვილი. თითოეული მოქალაქის ჩართულობას შეუძლია, მნიშვნელოვნად გააუმჯობესოს თავშესაფრის მკვიდრი დათვების საცხოვრებელი პირობები.

„ტყვეობაში მყოფი მურა დათვების დასახმარებლად, 2010 წელს, ცხვარიჭამიაში დაფუძნდა დათვების თავშესაფარი, რომელშიც 15 მურა დათვი მოთავსდა. დათვები წლების განმავლობაში უმძიმეს პირობებში ცხოვრობდნენ და ძალიან მცირე ზომის ვოლიერებში ჰყავდათ გამომწყვდეული, რის გამოც, ბუნებრივ გარემოსთან ადაპტირებული არ არიან და მათივე უსაფრთხოების მიზნით, თავშესაფარში ხანგრძლივი დროით უნდა იცხოვრონ. დათვების მოვლისა და სათანადო პირობებით უზრუნველყოფის ხარჯები იზრდება, თავშესაფრის ფინანსური რესურსი კი მწირია. გარემოს დაცვისა და სოფლის მეურნეობის სამინისტროს შუამავლობით და კერძო სექტორის მხარდაჭერით, შესაძლებელი გახდა დათვების რეაბლიტაციისთვის დამატებითი რესურსების მობილიზება“, – განაცხადა თავშესაფრის დამფუძნებელმა, სოსო ჯიქურიშვილმა.


„დისტანციური მეურვეობის პროგრამა“

2019 წლის 1 მაისიდან „დათვების თავშესფარი“-ს მიერ ამოქმედდა „დისტანციური მეურვეობის პროგრამა“. პროგრამა ითვალისწინებს თავშესაფარში ბინადარი დათვების  დისტანციურ პატრონობას, რაც ნიშნავს იმას,  რომ მსურველი პირი ხდება კონკრეტული ცხოველის ოფიციალური დისტანციური პატრონი“.  მსურველს ეძლევა საშუალება შეარჩიოს მისთვის სასურველი ცხოველი თავშესაფარში და  მეურვეობის პერიოდი.  ამ შემთხვევაში  ცხოველი აგრძელებს ბინადრობს თავშესაფარში, ხოლო პატრონი უზრუნველყოფს ყოველთვიურ შემოწირულობას (დისტანციური მეურვეობის გადასახადს) ორგანიზაციის მიერ დადგენილი ოდენობით. პროგრამის ძირითადი მიზანია თავშესაფარში ბინადარი დათვების საარსებო პირობების უზრუნველყოფა, კონკრეტული პირის – „დისტანციური პატრონის“ მიერ ცხოველის დახმარება. მთავრი მიზანი კი არის თავშესაფარში ბინადარი გადაშენების საფრთხის პირას მყოფი „წითელი ნუისხით“ დაცული ცხოველებისადმი ჰუმანური დამოკიდებულება და მათი დახმარება. თავშესაფარში ერთი  ზრდასრული დათვის  კვების რაციონი ყოველდღიურად შეადგენს  5კგ. ხილ-ბოსტნეულს და 1 კგ. თევზს, რასაც ყოველთვიურად ესაჭიროება 350 დან 400 ლარამდე.

დათვების თავშესაფარი მადლობას უხდის იმ ადამიანებს, რომლებიც უკვე გახდნენ, ან მომავალში გახდებიან თავშესაფრის ცხოველების, „დისტანციური მეურვეები“. შეარჩიეთ თავშესაფარში თქვენთვის სასურველი დათვი და გახდით „დისტანციური პატრონი“


„ნაკრესმა“ ტყვე დათვების პროექტი დაიწყო

საერთაშორისო ორგანიზაცია World Animal Protection-თან ერთად დავიწყეთ ტყვე დათვების აღრიცხვის პროექტი, რომლის ფარგლებშიც დავადგენთ არაკანონიერ საკუთრებაში მყოფი დათვების რაოდენობას. ტყვე დათვების პრობლემაზე მუშაობა „ნაკრესმა“ ჯერ კიდევ 1990-იან წლებში დაიწყო. იმ პერიოდიდან მოყოლებული დღემდე მონიტორინგს ვაწარმოებთ და ეს უკვე რიგით მეოთხე კვლევაა, რაც დინამიკაზე დაკვირვების საშუალებას გვაძლევს. ბოლო მონაცემებით, საქართველოში დაახლოებით 30-35 დათვია არაკანონიერ მფლობელობაში. დათვები ტყვეობაში, ძირითადად, ბრაკონიერობის გზით ხვდებიან. როგორც წესი, დატყვევებული ცხოველები ჰყავთ უმძიმეს პირობებში ძალიან მცირე ზომის გალიებში და მათთვის უვარგის საკვებს აჭმევენ. ხშირად ისინი, კლიენტების მიზიდვის მიზნით, განთავსებული ჰყავთ გზისპირა რესტორნებსა და ბენზინგასამართ სადგურებთან. აღსანიშნავია, რომ ზრდასრული ასაკის შემდეგ დათვების ბუნებაში დაბრუნება შეუძლებელია, რადგან ახალ გარემოს ვეღარ ეგუებიან და ისევ ადამიანებთან ბრუნდებიან. ასევე, ვერ ხერხდება მათი ზოოპარკში გადაყვანა, რადგან ის რეკონსტრუქციის პროცესშია და დამატებითი ინდივიდების მიღების საშუალება არ აქვს. ამდენად, პრობლემის მოგვარების გზა არის ცალკე თავშესაფრის აშენება, შესაბამისი კვების და პირობების უზრუნველყოფა. ამ პრობლემების გადასაჭრელად გარემოს დაცვის სამინისტროსთან ერთად ვმუშაობთ.

„ნაკრესის“ მიერ დაწყებული პროექტი ასევე მიზნად ისახავს დათვის ბელების ნაწილებით უკანონო ვაჭრობის აღმოფხვრას. ამისათვის ჩავატარებთ მოკვლევას საგაზეთო და ინტერნეტ განცხადებებში და ადგილობრივ ბაზრებზე. დავადგენთ გასაყიდი სხეულის ნაწილების წარმომავლობას და მათ საბაზრო ღირებულებას. გამოვითხოვთ ინფორმაციას საბაჟო სამსახურებიდან „წითელ ნუსხაში“ შესული სახეობების ნაწილების ჩამორთმევის ფაქტებზე. მას შემდეგ რაც გამოიკვეთება საქართველოში დათვის ბელების ნაწილებით უკანონო ვაჭრობის მასშტაბი, სახელმწიფო უწყებებთან ერთად მივიღებთ შესაბამის ზომებს. დასასრულ უნდა აღინიშნოს, საქართველოს „წითელი ნუსხისა“ და „წითელი წიგნის“ შესახებ საქართველოს კანონის თანახმად, „წითელ ნუსხაში“ შესული ცხოველების, მათ შორის, დათვის მოპოვება დასაშვებია მხოლოდ განსაკუთრებულ შემთხვევებში – გადარჩენის, განკურნების, პოპულაციის აღდგენისა და სამეცნიერო მიზნებისათვის, რაც ხორციელდება საქართველოს გარემოსა და ბუნებრივი რესურსების დაცვის სამინისტროს წერილობითი თანხმობით. დათვის უკანონოდ მოპოვება და მოკვლა არის სისხლის სამართლის პასუხისმგებლობის დაკისრების საფუძველი. ხოლო ერთი დათვის უკანონოდ მოპოვებით გარემოსათვის მიყენებული ზიანის თანხა შეადგენს 50 000 ლარს.